"Soy frontera"

Bilboko Udalak bat egingo du gaur, ekainak 20, Errefuxiatuen Munduko Egunaren ospakizunekin. Nazio Batuek sustatutako data da, gatazkak, jazarpenak, indarkeria edo giza eskubideen urraketak direla-eta euren etxeak utzi behar izan dituzten milioika pertsonaren indarra, duintasuna eta eskubideak aitortzeko. Jardunaldi honen inguruan antolatutako programazioak gizarte inklusiboak, kohesionatuak eta giza eskubideekin konprometituak eraikitzeko premian jartzen du arreta, nahitaezko lekualdatzeek eta gorroto- eta bazterketa-diskurtsoek markatutako nazioarteko testuinguru batean. ETXEARI BURUZ GOGOETA EGITEKO KARTELA Karina Senatore ilustratzaileak sortu du aurtengo kanpainaren irudia. Proposamenak etxea eraikuntza kolektibotzat hartzen du. Ilustrazio honek erretratuak, mapa-zatiak eta arkitektura gainjarriak konbinatzen ditu, kidetasun-sentimendua osatzen duten ibilbide, memoria eta esperientzia ezberdinak irudikatzeko. Etxebizitzak ezinezko egitura batean elkartuta ageri dira, sinbolizatuz nortasuna eta etxea hainbat lekutatik, migrazio-ibilbideetatik eta esperientzia partekatuetatik eraikitzen direla. Aurpegiak zeharkatzen dituen banda kartografikoa da seriearen ardatz nagusia, eta joan-etorriak, mugak eta lurraldeen arteko loturak irudikatzen ditu. Obrak herritar guztiei zuzendutako galdera bat planteatzera gonbidatzen gaitu: zer esan nahi du etxean bezala sentitzeak? “SOY FRONTERA” ANTZEZLANA ITSASMUSEUM-EN Errefuxiatuen Egunaren testuinguruan, ekainaren 29an, Itsasmuseumen programa ixteko ekitaldia egingo da 18:00etan, Soy Frontera antzezlanarekin. Teatro Sin Papeles-en proposamena da, eta ZAS! Zurrumurruen aurkako Euskal Sareak eta AMEKADIk antolatu dute. Lan horrek diasporako eta giza mugikortasuneko prozesuak bizi dituzten pertsonen espazio sinbolikoetan murgiltzera gonbidatzen du publikoa. Testiga kutsuko hizkuntza poetiko eta ironiko baten bidez, ibilbide bat proposatzen du zauri kolonialetan, nortasun mestizoetan eta kidetasun-modu berrietan zehar, aniztasuna aberastasun kolektibo gisa aldarrikatuz eta gure gizarteek bizi dituzten muga fisiko eta sinbolikoak zalantzan jarriz. Sarrera librea izango da, leku guztiak bete arte. KULTURA, TEKNOLOGIA ETA ENPATIA "CARNE Y ARENA"REKIN Aurten, gainera, data hori "Carne y Arena (Virtualmente presente, físicamente invisible)" erakusketaren azken eguna izango da. Erakusketa hori Alejandro González Iñárritu zinemagile mexikarrak sortu duen instalazio murgiltzailea da, Bilboko Udalaren, Bizkaiko Foru Aldundiaren, BBK Fundazioaren eta EITBren arteko lankidetzari esker Bilbon martxotik gaur arte aurkeztua. Instalazio artistikotik harago, "Carne y Arena" hiri mailako ekimen bihurtu da, eta migrazioei, harrerari, kultura-aniztasunari eta kulturarteko bizikidetzari buruzko topaketa-, elkarrizketa- eta hausnarketa-espazioak sortzea ahalbidetu du. Hilabete hauetan, elkarrizketa publikoak, erakusketak, topaketak adituekin, hezkuntza-jarduerak eta hausnarketa komunitarioko saioak egin dira, ZAS! Zurrumurruen aurkako Euskal Sarearekin, gizarte-entitateekin eta kultura-eragileen batera bultzatuak, zenbait data enblematikorekin bat etorriz: Arraza Diskriminazioaren Aurkako Nazioarteko Eguna, Kultura Aniztasunaren Munduko Eguna eta Errefuxiatuen Munduko Eguna. Entitate antolatzaileek egindako balantzean, bereziki nabarmentzen da kulturaren eta teknologia murgiltzaileen gaitasuna enpatia sustatzeko, aurreiritziak zalantzan jartzeko, eta herritar kritikoagoak eta giza eskubideekin konprometituagoak sortzeko. HAUSNARGUNEEN AZKEN SAIOA Errefuxiatuen Munduko Egunari lotutako programazioak, gainera, datorren ostegunean, ekainak 25, Hausnarguneen saio berri batekin jarraituko du. Hausnarguneak kulturarteko gogoetarako guneak dira, ZAS! Zurrumurruen aurkako Euskal Sareak bultzatuak "Carne y Arena" erakusketaren testuinguruan. Saio horiek aukera eman dute adituak, herritarrak eta migrazio-esperientzia desberdinak dituzten pertsonak elkartu daitezen, bizikidetzari, kultura-aniztasunari, berdintasunari eta giza eskubideei buruz kolektiboki hausnartzeko, eta "Carne y Arena" erakusketak sorrarazitako emozioak elkarrizketa eta ikaskuntza partekatuko prozesuetara eramateko.