Harriak 2026 (Eremuak): "h A* rrA** pA*** tu"

h A* rrA** pA*** tu iluntasuneko desio bat da, harrapatu!! Edo izan liteke egunerokotasunean oraindik bistakoa ez denaren adierazpen bat ere. Oraindik existitzen ez den zerbait, eta, beraz, existiarazi egin behar dena. Hemen sorginkeriak, begiradak eta hipnosiak gertatuko dira. Bitartean: A* k katuekin eguzkia hartzen du. A** k jarrera zoliak eta desafiatzaile samarrak hartzen ditu. A*** debekatuta dagoen zerbait egiteko zorian dago. Eta hau fikzioa baldin bada, orduan elkar sortutako fikzio bat da, baita samurtasunetik, edo gogortasunetik egindako autoerretratu etengabe bat ere. Ezin dut ezkutuan gorde, egia esan, haien irudiagatik erakarri ninduten hiru artista hauek, buruan dudan haien irudiagatik. Irudi horrek erakarri eta liluratu egiten nau… halako magiaz! Halako magia bat dutelako haiengan. Egiten didaten sorginkeria bat da, deabrutze bat, haien begiradaren, haien jarrera zoli eta delikatuaren, haien ahots xarmagarriaren, haien marrazki eta soinuaren bitartez. -Erakusketan sartzen gara. Barruan gaude- Orain denok gaude sorginduta, orain erraldoiak garen mundu baten parte gara. Edo agian mundua da erraldoia… Edo baliteke gu txiki-txiki bihurtu izana eta horregatik txikia erraldoia iruditzea. Nolanahi ere, orain zu, ZEU! zara mundu horren parte. Haiek paisaia bat harrapatu dute eta paisaiak zu harrapatu zaitu. Orain mundu honen parte zara, eurena, eurena zara. Hemen begi asko saiatuko dira zu seduzitzen. Batzuek lortuko dute. Beste batzuek, berriz, inguratu bakarrik egingo zaituzte. Begizta amaigabe batean ibiliko dira zelatan, bakoitzak bere bidea egiten, zuk oraintxe bertan bezala, zeren, orain, ezinbestean, mundu berri honen parte baitzara, harrapatutako nahi, soinu eta izakiez egina den honetan. Egia da bai, hemen antzinako ukitu bat sumatzen da. Ikusi eta nabaritu egiten duzu, magikoa eta antzinakoa, bai. Zure presentziaren gainetik hegan dabiltzan aukera ezezagunez betetako iluntasunean: BAT, haiek begiratzen saiatzen zara soilik, haien mugimenduaren haloa ikustera bakarrik iritsita, edo, BI, erabakitasunez harrapatzen dituzu, eta horrek, A* k dioen bezala, zure arreta handiena eskatuko du. Erronka bat da, norbaitek erronka egiten dizu. Zure urdailetik garondoraino sortutako hotzikaraz xuxurla bat entzungo duzu: h A* rrA** pA*** tu