"LAU TEILA", Jose Pablo Arriaga

LAU TEILA Jose Pablo Arriaga eskultorearen proiektu artistikoa da. Ia urtebeteko itsas bidaia batean garatu zen: Bizkaia belaontzia Mutrikutik abiatu zen, eta Atlantikoan eta Karibean 8.500 itsas milia baino gehiago egin zituen. Bidaian nabigazioa, familiarekin bizitako esperientziak, beste kultura batzuekiko topaketak eta sorkuntza artistikoa uztartu ziren. Proiektuak mugimendua, memoria eta itsasoarekiko lotura ditu ardatz, baita bizitako esperientziek pertsonengan eragiten duten eraldaketa ere. Buztin-itxuraz margotutako egurrezko teilak bidaian eraman genituen, topaketaren, kidetasunaren eta harreraren sinbolo gisa. Itsas bidaia, sorkuntza-prozesu Proiektuaren abiapuntua euskal baleazaleen oroitzapena da. Ternuara zihoazenean, teilak eramaten zituzten lasta gisa. Gure bidaian, egurrezko teilak leku batetik bestera eraman eta hainbat tokitan utzi genituen, topaketaren eta presentziaren aztarna sinboliko gisa. Mutrikura itzultzeak ez zuen proiektua amaitu; beste etapa bat ireki zuen. Bidaian bizitako esperientziak irudien, dokumentalaren eta sorkuntza artistikoaren bidez lantzen jarraitzen dute.