"Hegoak"

"Isiltasunaren hautu erradikal honek lekua arretaz entzuteko aukera emango dit, unean uneko soinu-giroa. Musikarik gabe, dantzak bere erritmoa aurkitu beharko du, denbora berriak esploratuz. Beraz, Chillida Lekuren ingurunearekin elkarrekintzan, Hegoak lanaren bertsio berri bat sortzea da nire asmoa; "isiltasunaren ertzean"; pieza koreografiko bat, denbora esploratzeko” - Mizel Théret Le temps d 'aimer la danse jaialdiaren baitan Hegoak lana Biarritzen estreinatu ondoren, Mizel Théretek bere lana berrikusiko du Chillida Lekun, bertako inguruarekin dardararazteko. Museoan zazpi egun eman ondoren, Espíritu de los pájaros II eskulturan inspiratuta egindako ikerketa-lana publikoarekin partekatu nahi du. Artistak leku honetan inskribatu nahi du bere keinu koreografikoa, ingurunearekin elkarreraginez eta isiltasuna entzutearen alde eginez, espazioak eskaintzen dizkion erritmoekin bat etortzeko. Mizel Théret (Hazparne, Lapurdi, 1959) Koreografoa eta dantzaria, Mizel Théretek dantza tradizionalean hasi zuen bere ibilbidea eta dantza garaikidean jarraitu zuen Parisen hainbat irakaslerekin (Ruth Barnes/Cunningham teknika; Peter Goss) eta dantza klasikoan (Yves Casati). 1983an EKARLE konpainia sortu zuen Baionan, eta hainbat sorkuntza egin zituen bertan. Bere lehen lanen ezaugarria da euskal dantza tradizionalaren hizkuntza «cunninghamianoa» (abstraktua) uztartzeko borondatea; ondoren, dantza tradizionaletik urrundu zen, hizkuntza garaikide hutsera bideratzeko eta «abstrakzio lirikoak» markatutako dantza garatzeko. 2011tik, "Traversée" konpainia zuzentzen du Johanna Etcheverry koreografo eta pedagogoarekin batera. «Memoria» (kolektiboa eta indibiduala) bere lanen erdigunean kokatzen du, eta gorputzaren, espazioaren eta denboraren arteko aliantza aztertzen duen keinuak egiten ditu askatasun osoz. Bere azken lanetan (2012tik) estilo minimalista aukeratu du, bai dantzari dagokionez, bai idazkera koreografikoari dagokionez. Keinuaren eskema, abstrakzioa eta poesia, espazio hutsa, memoria: koreografoak bide malkartsu horietan aurrera egiten du. Soiltasun handiko dantza defendatzen du, barnekotasun sakon batek animatua. Denboran zehar, Mizel Théret-ek hogei bat lan koreografiko sortu ditu.