LEB INTENSIF 2026

Nafarroako Elizondo herriak LEB Programaren arte eszenikoen topaketa den LEB INTENSIF ekimenaren edizio berri bat hartuko du urriaren 16tik 18ra. Programazioak herriko plazak, kaleak eta beste hainbat gune hartuko ditu, antzerki, dantza, musika, poesia eta ikus-entzunezko sorkuntzako proposamenekin. Edizio honek tokiko errotzean eta publikoen bitartekaritzan sakontzen du: herritarrek ikuskizunetara joateaz gain, sorkuntza-prozesuetan parte har dezaten eta horietan harremanak sortzeko gune bat aurki dezaten bilatzen du. LEBek bereziki eskualdeko gizarte-kolektiboekin egingo du lan, lurraldearekiko lotura sendotuz eta artisten, kultur elkarteen eta arte eszenikoetako profesionalen arteko lankidetza bultzatuz. Irisgarritasuna, euskararekin batera, programaren lehentasunetako bat izango da aurten ere. Programak ikusmen- eta entzumen-desgaitasuna duten pertsonentzako jarduera irisgarriak jasoko ditu, sarbide-premia desberdinak dituzten publikoen parte-hartzea zabaltzeko helburuarekin. Baztanen sortutako bi sorkuntza kolektibo Tokiko errotzeak forma hartuko du bertako erakundeekin batera garatutako bi sorkuntza prozesutan. The Cross Border Projecteko Lucía Miranda zuzendariak pieza bat sortuko du Baztango gizarte sarearekin batera. Emaitza urriaren 16an, ostirala, 18:00etan, Foru Plazan aurkeztuko da. Rakel Camacho zuzendariak bigarren sorkuntza bat bultzatuko du Baztango kultur erakundeekin batera. Jaialdia Elizondoko Abesbatzarekin, Iruritako Dantzariekin eta Musika Bandarekin harremanetan jarri da, proiektua beste elkarte batzuetara ere zabaltzeko. Pieza, AMAIA DA HASIERA, edizioari amaiera emango dio urriaren 18an, igandea, 18:00etan, Txokoto Zubiaren inguruan. Bi proposamenek tokiko parte-hartzea programazioaren erdigunean jarriko dute, euskaraz eta gaztelaniaz. Bitartekaritza jaialdia baino lehen hasiko da Aurretiazko programa Elizondoko Lanbide Eskolara ere iritsiko da. Bertako ikasleek ATX TEATROArekin lan egingo dute, espazio publikoan LEBi buruzko informazio gune gisa erabiliko diren hiru gorputz eskultoriko eraikitzeko. Urriaren 13an, Nafarroan Arte Eszenikoetako Batxilergoa eskaintzen duten hiru ikastetxetako —Plaza de la Cruz, Alaitz eta Corellako Arte Eskola— bigarren mailako ia ehun ikaslek sektoreko profesionalekin tailerretan parte hartuko dute. Topaketa Arte Eszenikoen Akademiarekin, Espainiako Eszena Zuzendarien Elkartearekin, Antzerki Egileen Elkartearekin eta Nafarroako Arte Eszenikoen Enpresen Elkartearekin elkarlanean antolatu da. Egun horretan bertan, jaialdiaren aurkezpen ekitaldia eta LEB Programaren urteko jarduera ildoak aurkezteko ekitaldia egingo da. Ekitaldia Valentziako UMAMI konpainiaren LA GULA lanarekin amaituko da, poesia, teknoa eta gastronomia uztartzen dituen proposamenarekin. Dagoeneko LEB INTENSIFen barruan, Lehen Hezkuntzako ikasleek eszenaren eta naturaren inguruko ibilbide gidatu batean parte hartuko dute urriaren 16an, ostirala. Ibilbidea La trapecionistaren eta Maitane Azpirozen ZUHAMU lanaren aurretik egingo da, ARBOLA jaialdiarekin elkarlanean. Arte eszenikoen hiru egun espazio publikoan Urriaren 16an, ostirala, The Cross Border Projecten lanaren aurkezpenaren ondoren, Merkatu Plazan B.O.B.A.S. Banda Orquestal Benéfica de Actos Sepulcrales ikuskizuna izango da, Jimena Cavalletti konpainiaren eskutik, 19:30ean. 21:00etan, Arizkunenea jauregiko patioak Ángel Sandimasen HITZA hartuko du, euskarazko bideomapping proposamena. Larunbatean ere, ordu berean, berriro eskainiko da. Larunbatean, urriaren 17an, NODEren AZTURA Foru Plazara iritsiko da, 13:00etan. Arratsaldean, Piszifaktoria ideien laborategiak HEGAN EGITEKO GOGOA aurkeztuko du Abesbatza Plazan, 16:00etan eta 18:30ean; Jokaik MUGARRI eramango du Foru Plazara, 17:00etan; eta Ertzak egun horretako arte eszenikoen programazioa OTEMPODIZ lanarekin itxiko du, 19:30ean. Ondoren, 20:00etan, Mozambikeko dantzari buruzko topaketa egingo da publikoarekin. AZTURA eta OTEMPODIZ hizkuntzarik gabeko proposamenak dira; HEGAN EGITEKO GOGOA eta MUGARRI, berriz, euskaraz garatzen dira. Igandean, urriaren 18an, MICROSTABLE jaialdiarekin elkarlanean, formatu txikiko hainbat proposamen izango dira: THE KID NEXT TO ME, Escultores del aireren eskutik, 12:00etan, 13:00etan eta 14:00etan; A TRAVÉS DEL ESPEJO, Ainhoa Egizabal eta Uxue Olazaranena, 12:15ean, 13:15ean eta 14:15ean; eta AMICO, Amico Teatrorena, 12:30ean, 13:30ean eta 14:30ean. Arratsaldean, Hasier Larretxeak euskarazko ITZULERAKO BIDEAK lana aurkeztuko du 17:00etan Txokoto Zubian, amaierako sorkuntza kolektiboaren aurretik.