Errenteriako Giza Eskubideen zinema dokumentalaren Jaialdia 2026

Errenteriako Giza Eskubideen Zinema Dokumentalaren Jaialdiaren bosgarren edizioa 2026ko azaroaren 30etik abenduaren 5era egingo da, eta Niessen Zinemak izango dira berriro ere emanaldien eta jardueren egoitza nagusia. OzZinema Elkarteak antolatuta, Errenteriako Udalaren laguntzarekin, jaialdiak zinema eta giza eskubideen inguruko hausnarketa uztartuko ditu sei egunez, gaur egungo gizarte-errealitate ezberdinak ardatz hartuta. Bosgarren edizio hau, gainera, Errenteriako Giza Eskubideen Jardunaldien atarikoa izango da. Hala, jaialdia udalerrian giza eskubideen inguruko sentsibilizazioa, hausnarketa eta elkarrizketa sustatzeko antolatzen diren jardueren esparru zabalago batean kokatuko da. Edizio berriaren datak iragartzearekin batera, jaialdiak film labur dokumentalak aurkezteko deialdia zabalik mantentzen du, urriaren 11ra arte. Izen-ematea Festhome plataformaren bidez egin beharko da. Gehienez 60 minutuko dokumentalak aurkeztu ahal izango dira, betiere giza eskubideekin lotutako gaiak ikuspegi eta begirada ezberdinetatik lantzen badituzte. Aniztasuna, berdintasuna, justizia soziala, migrazioak, memoria, ingurumena edota gatazka sozial eta politikoak dira deialdi honetan lekua duten gaietako batzuk. Helburua da zinema dokumentalaren bidez gure garaiko errealitateetara hurbiltzeko modu eta begirada ezberdinak biltzea. Hautatutako lanak jaialdiaren bosgarren edizioko programazioaren parte izango dira, eta Niessen Zinemetan proiektatuko dira, azaroaren 30etik abenduaren 5era bitartean. Lau edizioren ondoren, Errenteriako Giza Eskubideen Zinema Dokumentalaren Jaialdiak zinemagileen, ikusleen eta gizarte-eragileen arteko topagune gisa hazten jarraitzen du. Beste begirada batzuk hurbiltzeko, hausnarketa pizteko eta giza eskubideen inguruko elkarrizketa sustatzeko gai den zinemaren aldeko apustua egiten du jaialdiak. Bosgarren edizioaren programazio osoa, hautatutako filmak, gonbidatuak eta gainerako jarduerak datozen asteetan emango dira ezagutzera.