Udako lantegi irekiak 2026 Artium Museoan: "Itsas hondoen diorama"

Euskal Herriko Arte Garaikidearen Museoak, Artium Museoak, lantegi irekien programa aurkeztu du 2026ko udarako. Itsas hondoen diorama izenburuarekin, lantegi hauetan urpeko ekosistemen aberastasuna eta ingurune hori osatzen duten paisaiak aztertzea proposatzen da, haurren ingurumen-kontzientzia teknika artistiko batzuen eta besteen bidez landuz. Uztaileko eta abuztuko azken bi hamabostaldietan egingo dira, lantegiak, asteartetik ostiralera, goizez, museoaren barruan nahiz kanpoan. Sarrera doakoa da eta ez dago aurretik izena eman beharrik. Artium Museoak 2026rako udako lantegi irekiak aurkeztu ditu. Itsas hondoen dioramak izeneko lantegiak itsaspeko ekosistemen, bertako biztanleen, landarediaren eta ingurune askotariko eta hauskor hori osatzen duten paisaien aberastasuna ezagutzeko gune bat eskaini nahi du. Jardueraren bidez, parte-hartzaileak modu sortzailean hurbilduko dira itsas biodibertsitatera eta haren kontserbazioaren garrantziaz jabetu ahal izango dira. Sai horietan, itsas hondoan inspiratutako dioramak sortzeko hainbat teknika artistikorekin esperimentatuko da. Sorkuntza-prozesu hori abiapuntu izango da itsas ekosistemek behar dituzten zainketei buruz hausnartzeko eta publiko gazteenen artean kontzientzia ekologiko handiagoa sustatzeko. Praktika artistikoaren bidez, ingurune naturalarekin erlazionatzeko modu berriak ezagutzeko gune bat eskainiko da lantegietan, eta hainbat balio sustatuko dira, hala nola ozeanoekiko errespetua, erantzukizuna eta bere biodibertsitatearen zaintza. Lantegiak nahiz museoaren barruan, nahiz plazako lorategian egingo dira. Jarduera 5 eta 12 urte bitarteko haurrei zuzenduta dago, heldu bat lagun dutela, eta ez dago aurretik izena eman beharrik. Goizez izango dira, asteartetik ostiralera, egutegi honi jarraiki: Uztaileko bigarren hamabostaldian: 21, 22, 23, 24, 28, 29, 30 eta 31n | 11:30etik 13:30era Abuztuaren bigarren hamabostaldian: 18, 19, 20, 21, 25, 26, 27 eta 28an | 11:30etik 13:30era