Atlantikaldia 2026: Andeetako oihartzuna + Txorinho

2026ko Atlantikaldiaren egitarauaren barne. Andeetako Oihartzuna ikuskizunak Andeetako mendietatik Errenteriako itsasertzera eramango gaitu, musikaren eta dantzaren bidez. Kena, siku eta txarangoaren doinuek, kolorez beteriko dantzek eta aimara, kitxua eta euskaraz interpretatutako kantuek herrien arteko loturak, naturarekiko errespetua eta sustraien indarra ospatzen dituzte. Ozeanoa zeharkatzen duten uhinen moduan, Andeetako oihartzunak Euskal Herrira iristen dira, kultura eta hizkuntza ezberdinen arteko elkarrizketa bizia sortuz. Atlantikaldiaren izaera irekia eta kulturartekoa ederki islatzen duen proposamena. Txorinho hirukoteak Brasilgo musika instrumentalaren dotorezia eta aberastasuna ekarriko ditu Atlantikaldiara. Hugo Silveira, Dom Oliveira eta Dani Bordonabak osatutako taldeak gitarra, mandolina eta perkusioa uztartzen ditu, genero, erritmo eta doinu ezberdinetan barrena bidaiatzeko. Musika klasikoaren eta herrikoiaren arteko orekan, elkarrizketa musikal bizi eta naturala sortzen dute, instrumentu bakoitzari bere lekua emanez. Zuzenekoan, musikarien eta publikoaren arteko lotura estua eraikitzen dute, entzute lasaia eta emozioa protagonista bihurtuz.