"ANARENE", MIKEL BASTIDAren erakusketa

Mikel Bastidak (Bilbo, 1982) aspalditik izan du interes sakona historian eta zineman, eta biak izan ditu inspirazio-iturri. "Anarene" lanak modu poetikoan aztertzen du kontakizun zinematografikoek Estatu Batuetako paisaien eta errealitate fisikoen eraikuntzan izan duten eragin sakona. "Anarene" Texasko iparraldeko herrixka bati dagokion izena da, Peter Bogdanovichek 1971n Larry McMurtryren The Last Picture Show eleberrian oinarrituta egin zuen filmean agertzen dena. Zuri-beltzean filmatutako obra horretan, 1950eko hamarkadaren hasieran helduarora iristen ari den gazte talde baten istorioa kontatzen da, kulturalki zein ekonomikoki gainbeheran dagoen hiri batean. Egileak herrialdea zeharkatu du zinemak atzean utzitako irudi eta istorioen bila. Anarene benetako lekua da, edo behinola hala izandakoa. 1908an sortu zen, aurreko mendeko Texasko kokaleku txiki batetik abiatuta, eta XX. mendearen erdialdean ia erabat desagertu zen. Azken kolpea trenbideak bertatik igarotzeari utzi zionean jaso zuen, 1950eko hamarkadaren hasieran. Eduardo Momene argazkilariaren hitzetan: “Agian zinema zein argazkigintza estatubatuarrean dena da poesia, non munduko errealitate oro lehengai hutsa baita fikzioa -edo iruzur hori- eraikitzeko, zeinak adierazten baitu -mundu arruntaren- hitzek adierazi ezin duten esperientzia»