Expodistrito 2026: "ALDATZ GORA. MENDIKO HISTORIAREN 100 URTE"

Bilboko Udalak aldi baterako erakusketa deszentralizatuen EXPODISTRITO ziklo berria antolatu du beste behin. Era horretan, irailetik aurrera, programa honen edizio berri bat hasiko da, eta argazkigintzako eta arte plastikoetako proposamenak eskainiko dira. Erakusketa horietan honako artista hauek parte hartuko dute: Anna Surinyach (argazkia); Agus Morales (poemak); Mengyin Wang (pintura); Sheila Gonzalez Azcona (argazkia); Adela Blanco (pintura); Miguel Angel Vazquez (eskultura); 80ko hamarkadan Somerako K2 erakusketetan parte hartu zutenak (argazkia); eta Euskal Akuarelarien Elkartea (pintura). Halaber, Miguel de Unamunori eta zientziarekin zuen harremanari eskainitako erakusketa bat egongo da, Kultura Zientifikoko eta Berrikuntzako Unitateak eta Unamuno Museo Etxeak, Salamancako Unibertsitateak eta Bilboko Udalak antolatua; eta Pablo Picassori eskainitako omenaldi-erakusketa bat, artista plastiko, musikari eta poeten talde nabarmen batek 70eko hamarkadan haren mendeurrenean egindako ekarpenetan oinarritua, gaur egun Blas de Otero Fundazioaren funtsen parte direnak. Hiruhileko honetan, EXPODISTRITO programak hiru erakusketa eskainiko ditu, Bilboko historiaren hainbat alderdi erakusteko: Lehenengoa Zabala auzuneko tren-etxeei eskainitakoa da, 100. urteurrenean (1926/2026). Bigarrena 40, 50 eta 60ko hamarkadetako argazkien erakusketa bat da, eta Santutxuko Landerako txaleten bilakaera erakusten dute. Azkenik, ALDATZ GORA mendi-taldearen mendeurrena ospatuko da, Bilboko mendi-talde historiko horren historia errepasatzen duen argazki-erakusketarekin. Irailaren 1ean, asteartea, hasi eta 2027ko urtarrilaren 5era bitarte, Bilboko auzoetako Udaltegietan ziklo horren barruko erakusketak eskainiko dira. Atal berri honetan, Hiriko bizilagunek Expodistritoren proposamen artistikoak ikusgai izango dituzte auzo hauetako Udaltegietan: San Inazio-Ibarrekolanda, Castaños, Otxarkoaga, Begoña, Santutxu, San Frantzisko, La Bolsa, Abando eta Errekalde. Erakusketa guztiak doakoak izango dira, eta goizez eta arratsaldez bisitatu ahal izango dira. Programa osoa helbide honetan kontsulta daiteke: www.kulturabarrutik.eus. ALDATZ GORA. “100 urteko mendi-historia” Erakusketaren bidez, ALDATZ GORA mendi-taldearen mendeurrena ospatuko da. Ehunka pertsonak parte hartu duten Bilboko mendi-talde horren historia argazkien bidez errepasatuko da. Bildutako dokumentazioaren eta argazkien bidez, mendiko usadioen eta ohituren bilakaera ikus ahal izango da. Azaroak 25-2027ko urtarrilak 5 / Castaños Udaltegia EXPODISTRITO programa Bilboko Udaleko Kultura Sailaren ekimen bat da, eta horren helburua da Hiriko adierazpen artistikoak deszentralizatzea eta herritarrei artista berrien lana aurkeztea nahiz jada ospetsuak diren beste batzuen erakusleiho izatea. Artearen eta sormenaren sektorea babesteko ekimen hau Hiriko sorkuntza eta berrikuntza bultzatzeko estrategiaren zutabeetako bat da, eta hori Bilboko 2023-2033 Kultura Plan Estrategikoan jasotzen da. Ohi bezala, erakusketak txandakatu egingo dira, eta horietako bakoitzaren data zehatzak Udaltegietan bertan, Barrutietako kultur programazioa jasotzen duen web gunean (www.kulturabarrutik.eus) eta 010 telefonora deituta kontsultatu ahal izango dira.