Ondarearen Europako Jardunaldiak 2026 Nafarroan

Nafarroako Gobernuko Kultura Zuzendaritza Nagusia – Vianako Printzea Erakundeak bat egin du Europako Kontseiluaren ekimenarekin, Ondarearen Europako Jardunaldiak ospatzeko. Jardunaldiak 2026ko irailaren 25etik urriaren 4ra bitartean egingo dira. Aurtengo edizioak 104 jarduera proposatzen ditu Foru Komunitateko 42 herritan, eta 21 udal eta kontzejuren eta 16 elkarteren parte-hartzea izan du. Programa osoa Nafarroako jardunaldien webgunean kontsulta daiteke: https://jepnavarra.com. Baliabide hori ekitaldien geolokalizazioarekin eta QR kodeen bidez jarduerak kontsultatzeko aukerarekin osatuko da; kode horiek laster egongo dira eskuragarri. 2026ko edizioaren leloa «Arriskuan dagoen ondarea: biziberritu, eutsi, berrirudikatu» da, eta askotariko jarduerak eskaintzen ditu: Erdi Aroan egunerokoan erabiltzen ziren tresna eta lanabesen erakusketa Berbintzanan; Nafarroako erromantzeari buruzko haur-tailerra Nafarroako Errege Artxibo Nagusian; Erdi Aroko eskuizkribuei buruzko jarduera Xabierko Gazteluan; haurrentzako zeramika-tailerra Tuterako Dekanotza Museoan; eta Nafarroako ondare historikoko hainbat gunetara bisitak, besteak beste, Tafallako Jauregira, Vianako Santa Maria elizara, ‘Campo de Arlas’ erromatar aztarnategira eta Erriberriko Errege Jauregira. Zehazki, jarduera-eskaintzak hemeretzi bisita gidatu, hamalau tailer, hamahiru hitzaldi, hamabi erakusketa, zortzi ibilbide gidatu eta sei kontzertu biltzen ditu. Proposamen bakoitzari buruzko informazio zehatza eskuratzeko, herrika antolatuta kontsulta daitezke honako esteka honetan: https://jepnavarra.com/localidades/. Aurreko edizioetan bezala, publiko zabal eta askotarikoarengana iritsi nahi da, adin, interes eta gaitasun desberdinetako pertsonei zuzendutako jardueren bidez: adituak eta zaleak, bertako biztanleak eta bisitariak, familiak, ikasleak, haurrak, desgaitasuna duten pertsonak eta beste kolektibo batzuk. Era berean, elkarteek, fundazioek, gizarte-erakundeek eta administrazio publikoek kultura-ondarea kontserbatzeko, kudeatzeko eta zabaltzeko egiten duten funtsezko lana aitortu eta ikusarazten da. Nafarroako programaren erakunde koordinatzailea den aldetik, Nafarroako Gobernuak bere jardueren antolaketa, zabalkunde-kanpaina eta komunikabideekiko harremana bere gain hartuko ditu. Parte hartzen duten erakundeek Europako Kontseiluak sustatutako Europako ekimen honi lotutako aintzatespen-zigilua jasoko dute. Ondare Historikoaren Zerbitzuak eskerrak eman nahi dizkie antolatzaile guztiei, Jardunaldi hauek Nafarroako Kultura Ondarearen ospakizun bihurtzeko egindako ahaleginagatik. Halaber, garrantzitsua da gogoraraztea jarduera guztiak doakoak direla eta horietako hainbatetan aldez aurretik izena eman behar dela, edukiera mugatua baita. Ondarearen Europako Jardunaldiak Hamarkada bat baino gehiagoan, Ondarearen Europako Jardunaldiak erakunde publikoen, kultura- eta ondare-erakundeen, elkarteen, fundazioen, profesionalen, boluntarioen eta herritarren arteko topagune eta lankidetza-gune gisa sendotu dira. Horri esker, programazioa gero eta zabalagoa, askotarikoagoa eta lurraldeari lotuagoa izatea lortu da. Ekimen honek izandako arrakasta eta lortutako dimentsioa kultura-ondarea kontserbatzeko, ikertzeko, kudeatzeko, zabaltzeko eta transmititzeko egunero lan egiten duten eragile ugariren konpromiso partekatuari esker izan dira posible. «Arriskuan dagoen ondarea: biziberritu, eutsi, berrirudikatu» lelopean, 2026ko edizioak antolatzaileak eta bisitariak gonbidatzen ditu arriskuan dagoen ondarearen aberastasuna ezagutzera eta hura berreskuratzeko, kontserbatzeko eta transmititzeko egiten diren jarduketak ezagutzera. Ondareak nortasun kolektiboaren eraikuntzan duen funtsezko eginkizuna nabarmendu nahi da, baita gure inguruneetako memoria pertsonalean eta sozialean duen garrantzia ere. Jardunaldiek, gainera, ondarearen esanahiari eta hura zaintzeak dakartzan erronkei buruz hausnartzeko aukera eskaintzen dute. Hausnarketa hori bereziki garrantzitsua da kultura-ondare immaterialari dagokionez, hura ulertzea ezinbestekoa baita gure kultura-legatuari eragiten dioten egungo arriskuei aurre egiteko. Ezagutza, praktika, adierazpen eta tradizioen galera mehatxua da Europako kultura-aniztasunarentzat eta belaunaldien arteko balioen transmisioarentzat. Era berean, klima-aldaketak, urbanizazio azkarrak, ingurumen-degradazioak eta bestelako gizarte eta lurralde-eraldaketek aurrekaririk gabeko presioa eragiten dute ondasun, paisaia eta kultura-adierazpen ugariren gainean. Horrenbestez, beharrezkoa da horiek babestea, kontserbatzea eta etorkizuneko belaunaldiei transmititzea.